PARAISO SA PUSOD NG CAMOTES ISLAND (PAGBABALIK-TANAW SA KASAYSAYAN)

ISANG munting paraiso ang nakahimlay mga 33 milyang nutikal sa Hilagang Silangan ng siyudad ng Cebu sa sentro ng Pilipinas--at ito’y ang arkipelago ng Camotes.
Ang Camotes group ay kinabibilangan ng apat na pulo: Pacijan (bayan ng San Francisco, Poro (mga bayan ng Poro at Tudela), Ponson (bayan ng Pilar) at Tulang (isang barangay na matatagpuan naman sa San Francisco).
Sa antigong panahon ng bansa, ang coastal settlements sa mga islang ito ay nasa pusod ng sibilisasyon: maunlad na pangangalakal ng komunidad at mga mahahalagang daungan para sa mga artists at artisans.
Ang mga Asyano sa Timog Silangan at mga banyagang Tsino ay nagsidayo rito sa isla para maglatag ng kani-kanilang mga negosyo, katuwang ang karamihan sa mga mangingisda (mandaragat) at mga magsasaka, na binibigyang tibay naman sa pamamagitan ng isang buo at solidong pre-Hispanikong barangay na nalikha sa bayan ng Poro noong 70s.
Taong 1521, ilang araw matapos madiskubre ni Portuguese explorer Ferdinand Magellan ang Pilipinas para sa España, ang kasaysayan ay kumulapol sa mga isla ng Camotes.
Matapos ang makasaysayang misa sa Mazaua (Limasawa) Leyte, isinulat ni expedition official chronicler Pigafetta sa kanyang pluma na ang parada (flotilla) ng limang bangka ay sumaglit sa Polo (Poro), di-kalayuan sa Pozon (Ponson) at mga isla ng Ticobon (Pacijan), para hintayin si Kolambu, ang noo’y chieftain ng Mazaua.
Hindi naglaon ay tumulak na ang pangkat na iyon patungong Zubu (Cebu) kung saan itinirik ni Magellan ang isang dambuhalang Krus na yari sa kahoy upang magsilbing timbulan ng Kristiyanisasyon ng España sa Malayong Silangan. Kaya naman sa kasalukuyang panahon, nadiskubre na ng mga taong nagpapatirapa sa araw at kalikasan ang karisma ng Camotes (sweet potatoes o kamote sa salitang Español).
Nagtutungo na nga sila sa isla para tanghuran ang mga naggagandahang beaches at lakes; at walang pag-aalinlangang nilalagok ang mayabong na kultura at kasaysayang ibinubunyi sa pamamagitan ng mga awitin at kwento ng mga magagalang at responsibong mamamayan dito. (GILBERT LAGUNA PERDEZ/ SNIPER-XTREME.BLOGSPOT.COM)